(C.) In nomine sanctae et individuae trinitatis. Heinricus divina favente clementia quartus Romanorum imperator augustus. Imperialis potestatis est et pietatis omnium servituti congruis respondere beneficiis, videlicet ut, qui in servicii devotione se exibent promtiores, in servicii etiam remuneratione se iudicari digniores gaudeant et sublimiores. Notum igitur esse volumus omnibus Christi nostrique fidelibus tam presentibus quam futuris, qualiter nos ob firmam et inviolabilem fidem, quam Warmacienses cives patri nostro beatę memorię servaverunt et nobis etiam servare debent, consilio etiam et rogatu principum nostrorum, Alberti Maguntini archiepiscopi, Bvrchardî Monasteriensis episcopi, Frederici ducis, Godefridi comitis de Caloen, Herimanni marchionis, Gerardi de Wasemberc, teloneum videlicet, quod pater noster eis remisit, nos etiam eis remittimus – et Iudeis ibidem demorantibus – et stabili privilegio confirmamus in omnibus locis imperiali potestati assignatis, siquidem Franchennevvrt, Boparten, Hamerstein, Drvtmvnni, Goslarię, Angere et Nvorenberc. Insuper etiam censum, quem pro vigiliis omni anno soliti erant, salva tamen custodia civitatis, ut nobis perpetuam fidelitatem conservent, eis condonamus. Quam confirmationem supradictam remissione facta ut nullus successorum nostrorum videlicet regum seu imperatorum infirmare velit, rogamus et pro sui facti cuiuslibet optanda stabilitate obligamus; qui, quod absit, in quo nos infirmat, se et quod fecerit infirmari credat. Hanc igitur confirmationem, ut infra videtur, nostra manu in hac carta, quam scribi iussimus, inscriptam et nostri sigilli impressione insignitam omnis generationis tam futurę quam presentis noticię reliquimus. Et ut omnes horum imitacione regibus et dominis suis discant servare fidelitatem, nos eos omnibus cuiuslibet urbis civibus digniores iudicamus et eis maximam tocius iusticię dignitatem, quam apud predecessores meos et mecum habuerunt, in ęternum firmam concedimus.

Signum domni Heinrici quarti Romanorum imperatoris invic(M.9.)tissimi.

Arnoldus vice Alberti Maguntini archiepiscopi et archicancellarii recognovit. (SI.3.)

Data XVII. kl. novembris, indictione Vta, anno dominicę incarnationis millesimo CXII, regnante Heinrico V. rege Romanorum anno VI, ordinationis eius XII, imperii IIo; actum est Franchenevort; in Christo feliciter amen.