In nomine sanctae et individuę trinitatis. Heinricus divina favente clementia quartus Romanorum imperator augustus. Quoniam pater noster beatę memorię Heinricvs tercius Romanorum imperator augustus pro fidelitate sua ab insidiatoribus regni sui ęcclesiam Basiliensem distractam et attenuatam et pene ad nichilum redactam cognovit, afflictioni illius subvenire decrevit ac sic communi consilio fidelium et principum suorum et ob fidelissimum servicium Bvrchardi eiusdem ecclesię episcopi abbatiam Fabariensem cum omnibus pertinenciis suis prefatę ecclesię contradidit et, ut perpetuo ei obediret, eandem traditionem proprio privilegio confirmavit. Quapropter notum sit omnibus Christi nostrique fidelibus tam futuris quam presentibus, quod nos quoque iusta peticione Rodvlfi fidelis nostri eiusdem sedis episcopi, rogatu etiam et consilio aliorum nostrorum principum, Bvrchardi Monasteriensis episcopi, Widonis Curiensis episcopi, Ǒlrici Constantiensis electi, Epponis Nouariensis electi, ducum etiam: Frederici ducis, Bertholfi ducis, necnon et comitum: Godefridi palatini comitis, Herimanni marchionis, Rodvlfi comitis de Linzeburc, Arnolfi comitis, Folmari comitis, eandem tradicionem collaudamus. Et quia castrum quoddam, quod vocatur Rapoldstein, nobis multum necessarium, peticioni nostrę satisfaciens nobis tradere non dubitavit, eandem abbatiam cum alio allodio, de quo in alio privilegio plenius continetur, pro iusto concambio eiusdem castri stabilimus et proprio privilegio confirmamus, hac videlicet conditione, ut nulla deinceps persona parva sive magna eandem ecclesiam de supradicto concambio molestare, inquietare vel disvestire audeat. Si vero forte, quod absit, aliquis prave inductus hanc nostri privilegii paginam infirmare vel infringere temptaverit, sciat se compositurum mille libras auri, medietatem camerę nostrę et medietatem prefatę ecclesię. Quod ut verius esse credatur et ab omnibus inviolabiliter conservetur, hanc paginam manu propria corroboratam impressione nostri sigilli insigniri iussimus.

Signum domni (M.9.) Heinrici quarti Romanorum imperatoris invictissimi.

Bruno cancellarius recognovit.

Data VI. idus marcii, indictione VII, anno dominicę incarnationis millesimo CXIIII, regnante Heinrico quinto rege Romanorum anno VIIII, imperante III; actum est Basileę; in Christo feliciter amen.