In nomine sanctę et individuę trinitatis. Heinricus divina favente clementia Romanorum imperator augustus et infra. Inquisitione igitur facta, qui vel unde essent, qui prębendas ecclesiasticas pro beneficiis sibi vendicassent, factus est clamor super quosdam principes et homines ipsorum, et maxime super Bertholdum comitem de Nůwenburg, eo quod idem maximus invasor rerum ecclesiasticarum esset. Superveniens etiam Conradus abbas s. Mauricii martyris Ebersheymensis cenobii pedibus nostris cum fratribus suis prosternitur quęrimoniam faciens super eundem Bertholdum comitem, quod prędium ecclesię suę seu villam Wißwyler cum ecclesia ac mancipiis et omnibus appendiciis suis violenta ac tyrannica manu rapuerit. Unde solita pietate nostra comite simulque iudicium dei omnipotentis prę oculis habentes et regni nostri honoribus providentes omnem consessum principum, quid nobis super his agendum esset, requisivimus. Tunc episcopus Monasteriensis cęterique principes consilium dantes simulque adiudicantes decreverunt, quatinus prędictum comitem in audientia nostra responsurum de his, quibus accusatus fuerat, evocaremus. Ille vero sęveritatem imperii et iudicii nostri metuens nec quicquam iustę defensionis habens nobis ultro ea, pro quibus acclamatus fuerat, ecclesiis dei restituenda reddidit etc.