(Entwurf für ein Diplom)
a) (+) In nomine sancte et individue trinitatis. Anno domini millesimo centesimo sextodecimo, idus madii, indictione nona. Henricus dei gratia Romanus imperator quartus cesar augustus. Imperialis proprium est clementie fidelium nostrorum precibus pro merito sue devotionis in beneficiis largiendis annuere. Proinde cunctorum civium Bononiensium personas, sed et res eorum mobiles vel immobiles, tam acquisitas quam acquirendas, in nostra speciali tuitione seu defensione recipimus, ubicumque contingat eos degere vel conversari, ita ut nequis hominum presumat eos iniuste molestare vel eorum personas seu res aliquibus iniuriis afficere. Omnes publicas vias tam in terris quam in aquis, et nominatim navigium Padi, et deorsum in Uenetiam et sursum in Longobardiam, ita libere concedimus eis, ut nequis hominum prorsus audeat eos in hisdem viis et itineribus aliquatenus impedire vel quibusdam molestiis implicare. Nemo eos usquam constringat, nullam prestationem quisquam ab eis exigat occasione banni vel ripatici vel alicuius talis cause nomine – et hoc nominatim in Ferraria eiusque territorio vetamus –, exceptis nostris legatis, qui per loca solent ea, que iuris et consuetudinis sunt, facere et exigere. Antiquas etiam eorum consuetudines intactas et illesas perpetuo precipimus observari; et pabulum silve a plebe Buida usque ad paludes et usque ad Centum. In toto Reni alveo nichil fiat operis, quo peius navigetur. Negotiatores de Tuscia subter stratam negotiandi causa non transeant nisi duabus per annum vicibus, idest ad mercatum olivarum et sancti Martini. Pro parata seu fodero ultra centum libras denariorum Ueronensium non exigantur. Et nullus comes eorum colonos seu inquilinos pro albergariis, quod mansionaticum dicitur, molestare audeat. Quo tempore in nostra erunt expeditione, nulla de re iuditium eis pati volumus, nisi quid ibidem commiserint. Hec omnia pro tenore supra descripto in perpetuum custodiri demandamus. Si quis vero contra prephatum nostre clementie benefitium venerit vel hoc in aliquo violaverit, centum librarum auri purissimi pene subiaceat, cuius dimidium nostris scriniis, dimidium iamdictis persolvat concivibus. Quod ut verius credatur et appareat, sigilli nostri ymagine presens scriptum precipimus insigniri. Act. in loco, qui Gubernolo nuncupatur, indictione predicta.
(+) Ego B. dei gratia cancellarius subscripsi.
(+) Ego Wernerius iudex affui et [subscripsi].
(Zusatz zu dem Diplom)
b) Idem ipse imperator remisit predicto Bononiensi populo omnem offensionem, quam ipse populus aliquomodo sibi commisit, et precipue roccam, que ab ipso populo destructa fuerat, tam ipsi populo quam omnibus, qui auxilium prebuerunt. Hec omnia impetrata sunt ab Alberto Grasso et Vgone de Ansaldo; et huius precepti receptioni cum predictis affuit Azo filius Azonis et Wit(er)nus filius Carbonis et Rolandus nepos eius et Bon(onius) de Tegerio et Donusdeus filius eius et Guido de Beatrice et Petrus de Leone et Petrus clericus de Seralio. Hec omnia facta sunt in presentia Arduini filii Widonis et Conradi comitis et comitis Alberti filii Bosii et Pelauicini et Caualcabouis marchionis et Bernardi et Alberti germani, filii Mainfredi, et Vbaldi nepotis eorum et Guidonis filii Mainfredi et Uberti comitis Bon(onie) et Ducis filii Dindonis et Nordilli de Castro Veteri et Wilielmi filii Henrici de Uerona et Opizi de Gozaga et Sassonius de Bibianello et Vbaldi causidici de Carpeneta et Gandulfi iudicis de Argellata et Girardi de Plaza et Bruni de Monte et Henrici de Uerona.