Die Urkunden Heinrichs V. und der Königin Mathilde
<<187.>>

Heinrich bestätigt Gerhard und Wido Cani und ihren Standesgenossen die Jurisdiktion über die Bewohner des Hoflandes der Burgen Cella Monte, Frassinello Monferrato, Fubine und Cuccaro Monferrato, überlässt ihnen die kaiserliche bzw. pfalzgräfliche Gerichtsbarkeit über die dortigen Arimannen und gewährt ihnen den persönlichen Gerichtsstand vor sich oder dem Pfalzgrafen.

San Germano, 1116 (Mai 23) Juni 22.

In nomine sancte et individue trinitatis. Henricus divina favente clemencia quartus Romanorum imperator augustus. Iustis et rationabilibus nostrorum fidelium peticionibus assensus prebentes ideo fideliores eos in nostro servicio fore minime titubamus. Proinde cunctorum fidelium sancte dei ecclesie nostrorumque, presentium videlicet ac futurorum, noverit industria Sifredum dilectissimum nostrum Vercellensem videlicet venerabilem episcopum nostram humiliter exorasse clemenciam, quatenus Girardo et Guidoni Cani suisque eiusdem honori[s] consortibus omnem honorem et districtum omnium hominum habitancium in curte castrorum Cellarum ac Fraxonelli necnon et Fibinarum atque Cucari nostra imperiali auctoritate confirmare dignaremur. Cuius peticionibus annuentes et supradictorum consortum fidelitatem intuentes prenominatum districtum et honorem, sicut superius legitur, eisdem consortibus per huius nostri precepti paginam, prout iuste et legaliter possumus, concedimus et confirmamus et de nostro iure et dominio in eorum ius et dominium omnino transfundimus et delegamus, ut omnia supradicta tam ipsi quam sui heredes habeant et teneant atque possideant. Largimur insuper et huius nostre auctoritatis precepto confirmamus, ut iamdictis consortibus omnes arimanni, qui in curte vel districtu predictorum castrorum morantur, nostra imperiali auctoritate ad eorum conveniant placitum et ita per legem et pugnam omne placitum tam ipsi quam sui heredes ante se diffiniant, quemadmodum ante nostram presenciam vel nostri comitis palatini facere debuerant, omni ratione imperiali salva existente. Precipiendo itaque iubemus, ut nullus dux, marchio, comes, vicecomes, sculdaxio, gastaldus, decanus vel quelibet regni nostri magna persona vel parva predictos consortes aut suos heredes aut supradictos arimannos inquietare vel molestare aut de suis prediis disvestire aut in personas manum mittere presumat nec adsaltum super eos facere, non fodrum tollere, non fictum querere, non mansionaticum potestative accipere audeat, sed liceat eos sub nostra defensione quiete ac pacifice vivere omnium hominum contradicione remota. Hoc eciam iubentes interdicimus, ut nec dux, marchio, episcopus vel comes supradictos consortes aut suos heredes cum aliqua violencia ad suum placitum deducere aut invitare presumat, sed si aliqua lis aut contemptio orta fuerit inter eos et quemlibet alium hominem de qualibet re, volumus, ut iuste diffiniatur ante nos vel ante nostrum comitem palatinum. Si quis autem, quod non credimus, huius nostre confirmationis et concessionis atque defensionis [paginam] auctoritate sua temerarie ausus infringere temptaverit, sciat se compositurum auri optimi libras centum, medietatem camere nostre et medietatem iamdictis consortibus suisque heredibus. Quod ut verius credatur diligenciusque ab omnibus observetur, presentem paginam manu propria roborante[s] sigilli nostri impressione inferius insigniri iussimus. Burcardus canzelarius et episcopus, Ardicio episcopus, Guido comes palatinus, Bonifacius marchio, Anselmus marchio, Raynerius marchio.

Data X. kl. iunii, indicione nona, anno dominice incarnationis MoCXVI, regnante Henrico quinto rege Romanorum anno decimo, imperante VI; actum est Paciliani; feliciter amen.