Die Urkunden Heinrichs V. und der Königin Mathilde
<<19.>>

Heinrich bestätigt den Kanonikern von St. Leo in Toul aufgrund eines Fürstenspruches das ihnen zuerst von dem Grafen Albert (I. von Dagsburg) und nach dessen Tod nochmals von seinem Sohn Hugo übertragene Lehen zu Fontenoy(-sur-Moselle) und verbietet dem Karl (von Fontenoy) weitere Übergriffe.

Straßburg, 1107 Juni 20.

(C.) In nomine scanctae (!) et individuę trinitatis. Heinricus divina favente clementia quintus Romanorum rex. Nostrum est omnium querimonias audire misericorditer, et maxime aecclesiarum dei, quibus fit iniuria. Quapropter omnibus Christi nostrique fidelibus tam futuris quam presentibus notum fieri volumus, qualiter nos causa dei et interventu Brvnonis Treuerensis archiepiscopi, Otthonis Bauenbergensis episcopi, Ebrehardi Eistetensis episcopi, Bvrchardi Monasteriensis episcopi, Alberti nostri cancellarii, Gerardi comitis, Godefridi comitis, Fvlmari comitis aliorumque multorum nostrorum fidelium querimoniam fratrum Tvllensis aecclesię sancti Leonis audivimus. Fiebat enim eis iniuria á quodam Karolo de beneficio, quod comes Albertus in manu Bibonis Tullensis episcopi refutavit, eo quidem tenore, quod ad usus fratrum aecclesię beati Leonis traderetur. Facta autem refutatione ipso Alberto comite rogante et presente reposita est super altare sancti Leonis ab episcopo et ab eodem tradita per manum Rainardi comitis eiusdem loci fratribus. Et ne aliqua posset ratione fratribus fieri molestia, precepit ipse comes Albertus supramemorato Karolo, ne amplius se de illo beneficio, quod ab eo tenuerat in Fontiniaco, intromitteret nisi fratrum licentia. Illo vero nolente dimittere nec á fratribus querere querimonia fratrum ad nos pervenit, ut debuit. Nos vero misericordia moti nostros inde principes consuluimus et eorum consilio rem ita tractavimus, quod Hvgo filius Alberti comitis iam defuncti venit et in nostri presentia refutavit fratribus idem beneficium et laudavit, quod pater eius fęcerat. Ideo iusta ratione et iudicio et consilio nostrorum principum interdiximus Karolo, ne ulterius se intromitteret, et ita confirmavimus fratribus impressione nostri sigilli, ut omnes habeantur sub nostro banno, qui eos inde molestare presumpserint.

Signum domni Heinrici V. regis invictissimi. (M.4.)

Albertvs cancellarius vice Rotardi Maguntini archiepiscopi recognovit. (SI.D.)

Data XII. kl. iulii, indictione XIIII, anno dominice incarnationis millesimo CVII, regnante Heinrico V. rege Romanorum anno III, ordinationis eius VIIII; actum est Argentine; feliciter in Christo amen.