(C.) In nomine sanctę et individuę trinitatis. Heinricus divina favente clementia quartus Romanorum imperator augustus. Si condigna factis fidelium nostrorum premia recompensare studuerimus, procul dubio eos quoque in nostro servitio semper promtiores fore speramus. Quapropter omnium dei nostrique fidelium, presentium scilicet ac futurorum, noverit industria, qualiter nos fideli nostro et intimo Ottoni palatino comiti ob frequens obsequium suum tale predium, quale nos in nemore Chrusene habuimus, cum ceteris prediis Habechesperch pertinentibus et reliquis omnibus, quę tunc pro beneficiis de nobis habuit, cum agris, edificiis, terris, cultis et incultis, pratis, pascuis, campis, silvis, venationibus, aquis, aquarum decursibus, molis, molendinis, viis et inviis, exitibus et reditibus, quesitis et inquirendis seu cum omni utilitate, quę aut scribi aut nominari potest, in proprium tradidimus et de nostro iure ac dominio in suum ius atque dominium penitus transfundimus, eo quoque tenore, ut prescriptus Otto de eodem predio liberam deinceps habeat potestatem tenendi, tradendi, vendendi, commutandi vel, quicquid sibi placuerit, inde faciendi, omni remota contradictione. Et ut hęc nostrę traditionis auctoritas stabilis et inconvulsa omni tempore perseveret, hoc preceptum inde conscriptum subtusque manu propria corroboratum sigilli nostri impressione iussimus insigniri.

Signum Heinrici quarti Romanorum imperatoris invictissimi augusti. (M.)

Philippus cancellarius vice Adalberti Mogontini archicancellarii recognovit.

Acta sunt hęc in curia Aquisgrani, anno dominicę incarnationis millesimo centesimo XXV, XVIII. kal. mai, indictione IIIa; feliciter amen.