Heinricus dei gratia Romanorum imperator augustus O. Babenbergensium dilecto episcopo gratiam habunde et omne bonum. Roma nostri nuntii rediere et dei gratia ex parte maxima nobis lęta et prospera retulere. Mandant etiam nobis nostri fideles, quod tempus habemus acceptabile, ut Romanę sedi et rei publicę consulamus. Quapropter necessario nostros principes convocamus, ut inde, sicuti iustum est, eorum consilium et auxilium habeamus. Ad quod plurimum indigemus tuę fidei presentia et tui consilii prudentia, quoniam et te cordetenus diligimus et tibi de omni honore nostro prout nobismetipsis indubitanter confidimus. Confidenter igitur et intime tuam rogamus dilectionem, ut die Ueneris post proximum festum sanctę Marię venias ad nos Spiram, et ibi super his tui et aliorum nostrorum principum consilio ad dei honorem et regni et christianę pacis statum tractabimus. Et hylariter facias hoc sciens, quod te cito dimittemus et modo libenter tibi parceremus, nisi tam alti negocii nos urgeret instantia. Preterea mandamus tibi, ut mittas pro comite N., quem tibi commisimus, et ibi eum nobis representes.